କିଭ୍ : ପୂର୍ବ ୟୁକ୍ରେନର କ୍ରାମାଟୋର୍ସ୍କ ସହରରେ ଋଷ ସେନାର ଏକ ଭୟାନକ ବିମାନ ଆକ୍ରମଣ ଯୋଗୁଁ ଅତି କମରେ ୩୩ ଜଣ ନାଗରିକଙ୍କ ପ୍ରାଣହାନି ଘଟିଛି ଏବଂ ୧୮ ଜଣ ଗୁରୁତର ଆହତ ହୋଇଛନ୍ତି। ୟୁକ୍ରେନୀୟ ଅଧିକାରୀଙ୍କ ସୂଚନା ଅନୁଯାୟୀ, ଋଷ ଗ୍ଲାଇଡ୍ ବୋମା ବ୍ୟବହାର କରି ଯାତ୍ରୀବାହୀ ବସ୍ ଏବଂ ବସ୍ ଷ୍ଟପ୍ ଅଞ୍ଚଳକୁ ସିଧାସଳଖ ଟାର୍ଗେଟ କରିଥିଲା , ଯାହାଫଳରେ ଦୁଇଟି ଯାତ୍ରୀବାହୀ ବସରେ ନିଆଁ ଲାଗିଯାଇ ସମ୍ପୂର୍ଣ୍ଣ ପାଉଁଶ ହୋଇଯାଇଥିଲା।
ୟୁକ୍ରେନ ପୋଲିସ ଏବଂ ସ୍ଥାନୀୟ ପ୍ରଶାସନ କହିଛନ୍ତି ଯେ ଏହି ଆକ୍ରମଣ ସକାଳ ପ୍ରାୟ ୧୦ଟା ସମୟରେ ଘଟିଥିଲା, ଯେତେବେଳେ ସାଧାରଣ ନାଗରିକମାନେ ନିଜର ଦୈନନ୍ଦିନ କାର୍ଯ୍ୟ ପାଇଁ ଯାତାୟାତ କରୁଥିଲେ। ଡୋନେଟସ୍କ ଆଞ୍ଚଳିକ ମୁଖ୍ୟ ଭାଦିମ୍ ଫିଲାସ୍କିନ୍ ଏହି ଘଟଣାକୁ ନାଗରିକଙ୍କ ଉପରେ ଏକ ନିର୍ଦ୍ଦୟ ଆକ୍ରମଣ ଭାବେ ଅଭିହିତ କରିଛନ୍ତି। ସୁରକ୍ଷା ପରିସ୍ଥିତି ଅତ୍ୟନ୍ତ ବିପଜ୍ଜନକ ହୋଇପଡ଼ିଥିବାରୁ କ୍ରାମାଟୋର୍ସ୍କ ଏବଂ ପଡ଼ୋଶୀ ସ୍ଲୋଭିଆନ୍ସ୍କ ସହରରେ ସମସ୍ତ ସାର୍ବଜନୀନ ପରିବହନ ସେବାକୁ ତୁରନ୍ତ ବନ୍ଦ କରିଦିଆଯାଇଛି।
ଏହି ଭୟାନକ ଘଟଣା ଏପରି ସମୟରେ ଘଟିଛି ଯେତେବେଳେ ସମଗ୍ର ୟୁକ୍ରେନରେ ରୁଷର ଆକ୍ରମଣ ଆହୁରି ତୀବ୍ର ହୋଇଛି। ରାଜଧାନୀ କିଭ୍ ସମେତ ଅନ୍ୟାନ୍ୟ ପ୍ରମୁଖ ସହରଗୁଡ଼ିକ ଉପରେ ମଧ୍ୟ ଡ୍ରୋନ୍ ଓ କ୍ଷେପଣାସ୍ତ୍ର ମାଡ଼ କରାଯାଇଛି, ଯାହାଫଳରେ ବହୁ ଆବାସିକ କୋଠା ନଷ୍ଟ ହେବା ସହ ବିଦ୍ୟୁତ୍, ଗ୍ୟାସ୍ ଏବଂ ପାନୀୟ ଜଳ ଯୋଗାଣ ବ୍ୟବସ୍ଥା ସମ୍ପୂର୍ଣ୍ଣ ଭାବେ ବାଧାପ୍ରାପ୍ତ ହୋଇଛି। ଏହାଯୋଗୁଁ ଆଗାମୀ ଶୀତଦିନ ପୂର୍ବରୁ ସାଧାରଣ ସାଧାରଣ ଲୋକଙ୍କ ଦୁର୍ଦ୍ଦଶା ଆହୁରି ବୃଦ୍ଧି ପାଇଛି।
ୟୁକ୍ରେନ ରାଷ୍ଟ୍ରପତି ଜେଲେନସ୍କି ଏହି ଆକ୍ରମଣକୁ ନିନ୍ଦା କରିବା ସହ ନିଜ ଆକାଶ ମାର୍ଗକୁ ସୁରକ୍ଷିତ ରଖିବା ପାଇଁ ଆନ୍ତର୍ଜାତୀୟ ସମୁଦାୟ ନିକଟରୁ ଆହୁରି ଶକ୍ତିଶାଳୀ ଏୟାର ଡିଫେନ୍ସ ସିଷ୍ଟମ୍ ଯୋଗାଇଦେବାକୁ ଦାବି କରିଛନ୍ତି। ସେପଟେ ଋଷ ପକ୍ଷରୁ ଏହି ବସ୍ ଆକ୍ରମଣ ସମ୍ପର୍କରେ କୌଣସି ପ୍ରତ୍ୟକ୍ଷ ମନ୍ତବ୍ୟ ଦିଆଯାଇ ନାହିଁ।
