ଭୁବନେଶ୍ୱର, ୧୩/୧୨ : ନଭେମ୍ବର ମାସରେ ଓଡିଶାରେ ଖୁଚୁରା ମୁଦ୍ରାସ୍ଫୀତି ଏକ ଉଲ୍ଲେଖନୀୟ ହ୍ରାସ ଘଟି -1.29% କୁ ଖସି ଆସିଛି, ଯାହା ଜାତୀୟ ସ୍ତରର ମୁଦ୍ରାସ୍ଫୀତି ଧାରାକୁ ଅତିକ୍ରମ କରିଛି ବୋଲି ସୂଚନା ମିଳିଛି | ରାଜ୍ୟରେ ଏହି ନକାରାତ୍ମକ ମୁଦ୍ରାସ୍ଫୀତି ଅର୍ଥନୀତି ପାଇଁ ଏକ ସକାରାତ୍ମକ ସଙ୍କେତ ବହନ କରୁଛି |
ଜାତୀୟ ସ୍ତରରେ ଉପଭୋକ୍ତା ମୂଲ୍ୟ ସୂଚକାଙ୍କ (CPI) ଆଧାରିତ ଖୁଚୁରା ମୁଦ୍ରାସ୍ଫୀତି ନଭେମ୍ବର ୨୦୨୫ରେ ୦.୭୧%କୁ ବୃଦ୍ଧି ପାଇଛି| ପରିସଂଖ୍ୟାନ ଏବଂ କାର୍ଯ୍ୟକ୍ରମ ରୂପାୟନ ମନ୍ତ୍ରଣାଳୟ (MoSPI) ଅଧୀନରେ ଥିବା ଜାତୀୟ ପରିସଂଖ୍ୟାନ କାର୍ଯ୍ୟାଳୟ (NSO) ଦ୍ୱାରା ଡିସେମ୍ବର ୧୨, ୨୦୨୫ରେ ପ୍ରକାଶିତ ତଥ୍ୟ ଅନୁଯାୟୀ, ଅକ୍ଟୋବର ୨୦୨୫ରେ ଏହି ହାର ୦.୨୫% ଥିଲା| ଜାତୀୟ ସ୍ତରରେ ଖାଦ୍ୟ ମୁଦ୍ରାସ୍ଫୀତି ନଭେମ୍ବରରେ (-) ୩.୯୧% ରହିଥିଲା|
ଯେଉଁଠାରେ ସମଗ୍ର ଦେଶରେ ମୁଦ୍ରାସ୍ଫୀତିରେ ସାମାନ୍ୟ ବୃଦ୍ଧି ପରିଲକ୍ଷିତ ହୋଇଛି, ସେଠାରେ ଓଡିଶାର -1.29% ମୁଦ୍ରାସ୍ଫୀତି ଖାଉଟିମାନଙ୍କ ପାଇଁ ଏକ ବଡ଼ ଆଶ୍ୱସ୍ତି ଆଣିଛି | ଏହା ଦର୍ଶାଉଛି ଯେ ରାଜ୍ୟରେ ଦୈନନ୍ଦିନ ବ୍ୟବହାର୍ଯ୍ୟ ସାମଗ୍ରୀର ମୂଲ୍ୟ କମିଛି କିମ୍ବା ସ୍ଥିର ରହିଛି | ଜାତୀୟ ସ୍ତରରେ ଖୁଚୁରା ମୁଦ୍ରାସ୍ଫୀତିରେ ବୃଦ୍ଧି ପଛରେ ମୁଖ୍ୟତଃ ପନିପରିବା, ଅଣ୍ଡା, ମାଂସ ଓ ମାଛ, ମସଲା ଏବଂ ଇନ୍ଧନ ଓ ଆଲୋକର ମୂଲ୍ୟ ବୃଦ୍ଧି ଦାୟୀ| ତେବେ ଖାଦ୍ୟ ଦ୍ରବ୍ୟର ମୂଲ୍ୟ ହ୍ରାସ ପାଇଥିବାରୁ ଜାତୀୟ ଖାଦ୍ୟ ମୁଦ୍ରାସ୍ଫୀତି ଲଗାତାର ଷଷ୍ଠ ମାସ ପାଇଁ ନକାରାତ୍ମକ ରହିଛି|
ଓଡିଶାରେ ଏହି ନକାରାତ୍ମକ ମୁଦ୍ରାସ୍ଫୀତି ରାଜ୍ୟର ଅର୍ଥନୀତି ପରିଚାଳନାରେ ସଫଳତାକୁ ସୂଚାଉଛି | ଏହା କ୍ରୟ ଶକ୍ତି ବୃଦ୍ଧି କରିବା ସହିତ ଲୋକଙ୍କ ଉପରେ ଦରଦାମ ବୃଦ୍ଧିର ବୋଝ କମ୍ କରିବାରେ ସାହାଯ୍ୟ କରିବ | ଅର୍ଥନୀତିଜ୍ଞମାନଙ୍କ ମତରେ, ଏପରି ନକାରାତ୍ମକ ମୁଦ୍ରାସ୍ଫୀତି ସାଧାରଣତଃ ଯୋଗାଣରେ ଉନ୍ନତି, କ୍ରୟ କ୍ଷମତା ବୃଦ୍ଧି ଏବଂ ସରକାରୀ ନୀତିର ପ୍ରଭାବକୁ ଦର୍ଶାଇଥାଏ | ରାଜ୍ୟର ଗ୍ରାମୀଣ ଏବଂ ସହରୀ ଉଭୟ ଅଞ୍ଚଳରେ ଏହାର ସକାରାତ୍ମକ ପ୍ରଭାବ ଦେଖିବାକୁ ମିଳିବାର ଆଶା କରାଯାଉଛି |
#OdishaInflation #RetailInflation #IndiaEconomy #Deflation #EconomicNews #OdishaNews #BhalaKatha
