କଟକ : ସେକ୍ସଟର୍ସନ ଅଭିଯୋଗ, ୫ ଗିରଫ । କଟକରେ ଅବସରପ୍ରାପ୍ତ ସରକାରୀ କର୍ମଚାରୀଙ୍କୁ ସେକ୍ସଟର୍ସନର ଶିକାର କରି ୮୮ ଲକ୍ଷ ଟଙ୍କା ଠକେଇ ଅଭିଯୋଗ । ଏକ ଆନ୍ତଃଜିଲ୍ଲା ଗ୍ୟାଙ୍ଗର ପର୍ଦ୍ଦାଫାଶ କରିଛି କଟକ ସାଇବର ଥାନା ପୋଲିସ । ଏହି ମାମଲାରେ ୫ ଜଣଙ୍କୁ ଗିରଫ କରାଯାଇଛି । ଏବେବି ଫେରାର ଅଛି ମୁଖ୍ୟ ଅଭିଯୁକ୍ତ । ଜଣେ ୭୨ ବର୍ଷୀୟ ବୃଦ୍ଧଙ୍କୁ ପ୍ରଥମେ ଫେସବୁକ ମାଧ୍ୟମରେ ବନ୍ଧୁତାର ଜାଲରେ ଫସାଇଥିଲା ଅଭିଯୁକ୍ତ ।
ବିଶ୍ୱାସ ଜିତିବା ପାଇଁ ସରୋଜ ପ୍ରଥମେ ଚିକିତ୍ସା ବାହାନାରେ ପ୍ରାୟ ଦେଢ଼ ଲକ୍ଷ ଟଙ୍କା ନେଇ ପୁଣି ତାହା ଫେରସ୍ତ କରିଦେଇଥିଲା । କିନ୍ତୁ ଏହା ପଛରେ ଥିଲା ଏକ ବଡ଼ ଷଡ଼ଯନ୍ତ୍ର । ପରେ ନିଜ ଭଉଣୀ ନାଁରେ ଏକ ନକଲି ହ୍ୱାଟସଆପ୍ ଆକାଉଣ୍ଟ ଖୋଲି ବୃଦ୍ଧଙ୍କ ସହ ଚାଟିଂ କରିବା ସହ ଏକ ଭିଡିଓ କଲ୍ କରିଥିଲା ସରୋଜ । ସେଥିରେ ଜଣେ ନଗ୍ନ ମହିଳାଙ୍କୁ ଦେଖାଇ ଚତୁରତାର ସହ ବୃଦ୍ଧଙ୍କର ଏକ ଅଶ୍ଳୀଳ ଭିଡିଓ ରେକର୍ଡ କରିନେଇଥିଲା ।
ଏହି ଭିଡିଓ ଭାଇରାଲ୍ କରିଦେବାର ଧମକ ଦେଇ ବିଭିନ୍ନ ପର୍ଯ୍ୟାୟରେ ବୃଦ୍ଧଙ୍କ ଠାରୁ ୮ ମାସ ଭିତରେ ପ୍ରାୟ ୮୮ ଲକ୍ଷ ଟଙ୍କା ଲୁଟି ନେଇଥିଲେ ସରୋଜ ଓ ତାର ଗ୍ୟାଙ୍ଗ । ଏନେଇ ପୀଡିତ ବୃଦ୍ଧ ଥାନାରେ ଅଭିଯୋଗ କରିବା ପରେ ସାଇବର ଥାନା ପୋଲିସ ଯାଜପୁର ଧର୍ମଶାଳା ନିକଟ ପୋବଳା ମୁଖ୍ୟ ଅଭିଯୁକ୍ତ ସରୋଜ କୁମାର ଜେନାର ଘରେ ରେଡ କରିଥିଲା । ରେଡ ବେଳେ ସରୋଜ ଫେରାର ହୋଇଯାଇଥିଲା । ସେ ନିଜ ସାନ ଭାଇ ଓ ସମ୍ପର୍କୀୟଙ୍କୁ ନେଇ ଏହି ରାକେଟ୍ ଚଲାଉଥିବା ତଦନ୍ତରୁ ଜଣାପଡ଼ିଛି ।
