ମହାରାଷ୍ଟ୍ର: ମୁମ୍ବାଇର ଉତ୍ତର ଉପକଣ୍ଠ ମଲାଡରେ ଅଭାବନୀୟ ଘଟଣା ଘଟିଛି। କିଛି ଫଳ ବିକ୍ରେତା ବଜାରରେ ମୂଷା ମରା ବିଷ ଲଗାଇ ଫଳ ବିକ୍ରି କରୁଥିବା ଅଭିଯୋଗ ହୋଇଛି। ଏହି ଘଟଣାର ଅଭିଯୋଗ ପାଇବା ପରେ, ପୁଲିସ୍ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ବିକ୍ରେତାଙ୍କ ଦୋକାନକୁ ସିଲ୍ କରିଛି। ପୁଲିସ୍ ଏହି ଘଟଣାରେ ବିକ୍ରେତାଙ୍କ ସମେତ ଦୁଇ ଅଭିଯୁକ୍ତଙ୍କୁ ଅଟକ ରଖିଛି। ବିକ୍ରେତା ଫଳ ଉପରେ ରେଟିନାଲ ନାମକ ଔଷଧ ଲଗାଉଥିଲେ। ଘଟଣା ସେତେବେଳେ ସାମ୍ନାକୁ ଆସିଲା ଯେତେବେଳେ ଜଣେ ସ୍ଥାନୀୟ ନାଗରିକ କୁନାଲ ସାଲୁଙ୍କେ ଥାନାରେ ଲିଖିତ ଅଭିଯୋଗ କରିଥିଲେ।
ଦୁଇ ଫଳ ବିକ୍ରେତା ମୂଷା ଦାଉରୁ ଫଳ ଗୁଡିକୁ ରକ୍ଷା କରିବା ନାଁରେ ବିଷ ଲଗାଉଥିଲେ। ପୁରା ଘଟଣା କ୍ୟାମେରାରେ କଏଦ ହୋଇଛି। ଯାହାକୁ ପ୍ରମାଣ ଭାବରେ ପୁଲିସକୁ ହସ୍ତାନ୍ତର କରାଯାଇଛି। ମଲାଡ୍ ଥାନା ପୁଲିସ୍ ଅଭିଯୋଗକୁ ଗମ୍ଭୀରତାର ସହ ନେଇ ତୁରନ୍ତ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲା। ପଚରାଉଚରା ସମୟରେ ଅଭିଯୁକ୍ତମାନେ ସ୍ୱୀକାର କରିଥିଲେ ଯେ ସେମାନେ ଫଳଗୁଡ଼ିକୁ ମୂଷାଙ୍କଠାରୁ ରକ୍ଷା କରିବା ପାଇଁ ବିଷ ପ୍ରୟୋଗ କରୁଥିଲେ।
