ରାଉରକେଲା: ସୁନ୍ଦରଗଡ଼ ଟାଉନ ଥାନା ଅଧୀନ ବିଜୁ ଏକ୍ସପ୍ରେସ୍ ୱେ ଭଜପୁର ନିକଟ ସର୍ଭିସ୍ ରୋଡ୍ରୁ ଏକ କାର୍ ଭିତରୁ ଯୁବକଙ୍କ ମୃତଦେହ ଉଦ୍ଧାର ହୋଇଛି । ଏକ ପରିତ୍ୟକ୍ତ କାର୍ ଭିତରେ ଜଣେ ୨୨ ବର୍ଷୀୟ ଯୁବକଙ୍କ ମୃତଦେହ ରହସ୍ୟଜନକ ପରିସ୍ଥିତିରେ ମିଳିଛି। ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଉତ୍ତେଜନା ସୃଷ୍ଟି ହୋଇଛି। ସ୍ଥାନୀୟ ଥାନାକୁ ଘେରାଉ କରିଥିଲେ ସ୍ଥାନୀୟ ବାସିନ୍ଦା। ମୃତ ଯୁବକ ହେଲେ ରଙ୍ଗାଢିପା ଅଞ୍ଚଳର ଅଭିଜିତ ନାଏକ ।
ପରିବାରର ଅଭିଯୋଗ ଅନୁସାରେ, ବୁଧବାର ରାତିରେ ଅଭିଜିତ ଜଣେ ସାଙ୍ଗଙ୍କ ସହ ଘରୁ ବାହାରିଥିଲେ। ତେବେ ଦିନକ ପରେ ତାଙ୍କ ମୃତଦେହ ମିଳିବା ପରେ ଘଟଣାକୁ ନେଇ ସନ୍ଦେହ ବଢିଛି । ଅଭିଜିତଙ୍କ ଦେହର ବିଭିନ୍ନ ସ୍ଥାନରେ ମାଡ଼ ଦାଗ ଥିବାରୁ ତାଙ୍କୁ ହତ୍ୟା କରାଯାଇଥିବା ପରିବାର ଲୋକ ଅଭିଯୋଗ କରିଛନ୍ତି। ପୋଲିସ ମୃତଦେହ ଜବତ କରି ଘଟଣାର ତଦନ୍ତ ଆରମ୍ଭ କରିଛି । ଏହାପରେ ହତ୍ୟା ଅଭିଯୋଗ ଆଣି ମୃତକଙ୍କ ପରିବାର ବର୍ଗ ଓ ସମର୍ଥକ ଟାଉନ ଥାନା ଘେରାଉ କରିଛନ୍ତି। ପରିବାର ଅଭିଯୋଗ କରିଛନ୍ତି ଯେ ଅଭିଜିତଙ୍କୁ ହତ୍ୟା କରାଯାଇଛି। ପୋଲିସ୍ ପଚରାଉଚରା ପାଇଁ ବିଭୂତି ସାହୁ (୨୪) ଅଭିଜିତର ସାଙ୍ଗକୁ ଅଟକ ରଖିଛି।
ରିପୋର୍ଟ ଅନୁଯାୟୀ, ଅଭିଜିତଙ୍କୁ ଶେଷ ଥର ପାଇଁ ବୁଧବାର ସନ୍ଧ୍ୟାରେ ବିଭୂତି ସାହୁଙ୍କ ସହ ଦେଖିବାକୁ ମିଳିଥିଲା ଏବଂ ସେ ସେହି ରାତିରେ ଘରକୁ ଫେରି ନଥିଲେ। ଗୁରୁବାର ଦିନ SH-10 ରାସ୍ତା କଡ଼ରେ ଥିବା ଏକ ପୁରୁଣା ଲୁହା ସାମଗ୍ରୀ ଦୋକାନ (ସ୍କ୍ରାପ୍ ଦୋକାନ) ନିକଟରେ ପଡ଼ିରହିଥିବା ଏକ ପରିତ୍ୟକ୍ତ କାର୍ର ସାମ୍ନା ସିଟ୍ରୁ ତାଙ୍କ ମୃତଦେହ ଉଦ୍ଧାର କରାଯାଇଥିଲା।
ସୁନ୍ଦରଗଡ଼ ଉପ-ଖଣ୍ଡ ପୋଲିସ ଅଧିକାରୀ (SDPO) ନିର୍ମଳ ମହାପାତ୍ର କହିଛନ୍ତି ଯେ ଗୁରୁବାର ପୂର୍ବାହ୍ନ ପ୍ରାୟ ୧୧.୩୦ ସମୟରେ ସ୍ଥାନୀୟ ଲୋକେ ମୃତଦେହ ଦେଖି ପୋଲିସକୁ ଖବର ଦେଇଥିଲେ; ପରେ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରିଥିଲା। ଅଧିକାରୀ ଜଣକ କହିଛନ୍ତି ଯେ ଅଭିଜିତ ନାଏକଙ୍କ ବାମ କାଖ ଓ ପେଟର ନିମ୍ନ ଭାଗରେ କ୍ଷତ ଚିହ୍ନ ରହିଥିଲା।
SDPO କହିଛନ୍ତି ଯେ ପଚରାଉଚରା ସମୟରେ ବିଭୂତି ସାହୁ ପ୍ରକାଶ କରିଥିଲେ ଯେ ସେମାନେ ମଦ୍ୟପାନ କରି ଏକ ମୋଟରସାଇକେଲରେ ଯାଉଥିଲେ। ସେମାନଙ୍କର ଏକ ଦୁର୍ଘଟଣା ଘଟିଥିଲା, ଯାହା ପରେ ତାଙ୍କର ଆଉ କିଛି ମନେ ନାହିଁ। IIC କହିଛନ୍ତି ଯେ ମୃତ୍ୟୁ ପୂର୍ବରୁ ଅଭିଜିତ କାର୍ ଭିତରେ ବାନ୍ତି କରିଥିଲେ। IIC ଆହୁରି ମଧ୍ୟ କହିଛନ୍ତି ଯେ ଦୁଇ ଚକିଆ ଗାଡ଼ିରୁ ପଡ଼ିବା ପରେ ଅଭିଜିତ ଚାଲି ଚାଲି ସେହି ଗାଡ଼ି ପାଖକୁ ଯାଇ ସେଠାରେ ଶୋଇ ପଡ଼ିଥିବା ସମ୍ଭାବନା ରହିଛି। ମୃତକଙ୍କ ଭାଇଙ୍କ ଅଭିଯୋଗ ଆଧାରରେ ପୋଲିସ ଏକ ହତ୍ୟା ମାମଲା ରୁଜୁ କରିଛି। ଅଭିଜିତଙ୍କ ମୃତ୍ୟୁର ପ୍ରକୃତ କାରଣ ଜାଣିବା ପାଇଁ ଶବ ବ୍ୟବଚ୍ଛେଦ ରିପୋର୍ଟକୁ ଅପେକ୍ଷା।
