ନୂଆଦିଲ୍ଲୀ: CJPଙ୍କ ପ୍ରତିବାଦକୁ ନେଇ ଦିଲ୍ଲୀରେ ବିଶୃଙ୍ଖଳା ସୃଷ୍ଟି ହୋଇଛି । ଏହି ସମୟରେ, ଆଜି ଦିଲ୍ଲୀରେ ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ବିରୋଧରେ ପ୍ରତିବାଦ କରୁଥିବା TMC ମୁଖ୍ୟ ମମତା ବାନାର୍ଜୀଙ୍କୁ ଅଟକ ରଖାଯାଇଛି । TMC ସାଂସଦମାନଙ୍କ ସହିତ ବାନାର୍ଜୀ ସାଉଥ୍ ଆଭେନ୍ୟୁ ବସ୍ ଷ୍ଟାଣ୍ଡରେ ପ୍ରତିବାଦ କରୁଥିଲେ । ଏହି ସମୟରେ, ଦିଲ୍ଲୀ ପୋଲିସ ତାଙ୍କୁ ଏବଂ ଅନେକ TMC ନେତାଙ୍କୁ ଅଟକ ରଖିଛି ।
ପଶ୍ଚିମବଙ୍ଗ ରାଜନୀତିରେ ଏହା ହଇଚଇ ସୃଷ୍ଟି କରିଛି । ମମତା ବାନାର୍ଜୀଙ୍କୁ ଦିଲ୍ଲୀ ପୋଲିସ ଅଟକ ରଖିବାକୁ ନେଇ ରାଜନୀତି ତେଜିଛି । ଭୋଟ୍ ଜାଲିଆତି ଅଭିଯୋଗରେ ପ୍ରତିବାଦ କରୁଥିବା ସମୟରେ ମମତାଙ୍କ ସହ ଟିଏମସିର ଅନ୍ୟ ନେତାମାନଙ୍କୁ ମଧ୍ୟ ଅଟକ ରଖାଯାଇଥିବା ଦଳ ପକ୍ଷରୁ ଅଭିଯୋଗ ହୋଇଛି । ଏହାରି ମଧ୍ୟରେ ଟିଏମସି ସାଂସଦ ଡେରେକ୍ ଓ’ବ୍ରାଏନ୍ ଓ ପୋଲିସ ମଧ୍ୟରେ ତୀବ୍ର ବଚସା ହୋଇଥିଲା । ମମତାଙ୍କୁ ସ୍ପର୍ଶ ନକରିବାକୁ ସେ ପୋଲିସକୁ କହିଥିଲେ । ମମତା ବାନାର୍ଜୀଙ୍କ ମୁହଁରେ ବ୍ୟାଣ୍ଡେଜ୍ ଲାଗିଥିବା ଫଟୋ ଏବେ ସୋସିଆଲ ମିଡିଆରେ ଚର୍ଚ୍ଚା ଜୋର ଧରିଛି ।
ଏଥିସହ ଟିଏମସି ନେତା ସାକେତ ଗୋଖଲେଙ୍କ ଅଭିଯୋଗ ଅନୁସାରେ, ମମତାଙ୍କ ସମେତ ଅନ୍ୟ ପାଞ୍ଚ ଜଣ ନେତାଙ୍କୁ ଏକ ଗାଡ଼ିରେ ନିଆଯାଇଛି । ସାକେତ ଗୋଖଲେ ଏକ ସୋସିଆଲ ମିଡିଆ ପୋଷ୍ଟରେ କହିଛନ୍ତି, “ମମତା ଦିଦି ଏବଂ ଆମ ପାଞ୍ଚ ଜଣଙ୍କୁ ଦିଲ୍ଲୀ ପୋଲିସ ତାଙ୍କ ବାସଭବନ ବାହାରେ ଏକ ଜେଲ ଗାଡ଼ିରେ ଅଟକ ରଖିଛି ।” ଏହି ଘଟଣାକୁ ନେଇ ଟିଏମସି ଗଣତନ୍ତ୍ର ଉପରେ ଆକ୍ରମଣ ବୋଲି ଅଭିଯୋଗ କରିଥିବା ବେଳେ ରାଜନୈତିକ ମହଲରେ ଚର୍ଚ୍ଚା ସୃଷ୍ଟି କରିଛି ।
ମମତା ବାନାର୍ଜୀଙ୍କ ସମେତ ପୂର୍ବତନ ମୁଖ୍ୟମନ୍ତ୍ରୀ ତଥା ଆମ ଆଦମୀ ପାର୍ଟିର ରାଷ୍ଟ୍ରୀୟ ସଂଯୋଜକ ଅରବିନ୍ଦ କେଜରିୱାଲ, ଆପ ନେତା ସଞ୍ଜୟ ସିଂହ ଏବଂ ସୌରଭ ଭରଦ୍ୱାଜ ଏବଂ ଅନ୍ୟ କେତେ ଜଣଙ୍କୁ ଦିଲ୍ଲୀର ଜନ୍ତର ମନ୍ତରକୁ ଯାଉଥିବା ସମୟରେ ଅଟକ ରଖାଯାଇଥିଲା । ସେମାନଙ୍କୁ ପାର୍ଲାମେଣ୍ଟ ଷ୍ଟ୍ରିଟ୍ ପୋଲିସ ଷ୍ଟେସନକୁ ନିଆଯାଇଛି । ଫଳରେ ରାଜଧାନୀରେ ପ୍ରତିବାଦ ଜୋରଦାର ହୋଇଛି । ଆମ ଆଦମୀ ପାର୍ଟିର ରାଷ୍ଟ୍ରୀୟ ସଂଯୋଜକ ଅରବିନ୍ଦ କେଜରିୱାଲ ଶନିବାର ଦିଲ୍ଲୀର ଜନ୍ତର ମନ୍ତରରେ ହେବାକୁ ଥିବା ପ୍ରତିବାଦରେ ସାମିଲ ହେବା ଘୋଷଣା କରିଥିଲେ । ସେ ଗଣତନ୍ତ୍ର ବଞ୍ଚାଇବା ପାଇଁ ଲଢ଼େଇରେ ଅଂଶଗ୍ରହଣ କରିବା ପାଇଁ ତାଙ୍କ ସମ୍ପୂର୍ଣ୍ଣ ପରିବାର ସହିତ ଜନ୍ତର ମନ୍ତରରେ ପହଞ୍ଚିବେ ବୋଲି ସେ ସ୍ପଷ୍ଟ କରିଛନ୍ତି ।
ଅନ୍ୟପଟେ ପୋଲିସ ଆପ ନେତା ସୌରଭ ଭରଦ୍ୱାଜଙ୍କ ସମେତ ଅନେକ ବିରୋଧୀ ନେତାଙ୍କୁ ଅଟକ ରଖିଛି। ପୋଲିସ ଜନ୍ତର ମନ୍ତରରୁ ୧୫୦୦ ରୁ ଅଧିକ ପ୍ରଦର୍ଶନକାରୀଙ୍କୁ ମଧ୍ୟ ଅଟକ ରଖି ବସରେ ରଖିଛି । ସୂଚନା ଅନୁସାରେ, କେଜ୍ରିୱାଲଙ୍କ ବାସଭବନ ବାହାରେ ପୋଲିସ ମୁତୟନ ହୋଇଥିଲା । ସେ ଘରୁ ବାହାରିବା ପରେ ଅନେକ ନେତା ଓ କର୍ମୀଙ୍କୁ ଅଟକ ରଖି ବସ୍ରେ ନିଆଯାଇଥିବା ଅଭିଯୋଗ ହୋଇଛି । ଅଟକ ହେବା ପୂର୍ବରୁ କେଜ୍ରିୱାଲ ଲୋକଙ୍କୁ ଜନ୍ତର ମନ୍ତରରେ ପହଞ୍ଚି ପ୍ରତିବାଦ କରିବାକୁ ଆହ୍ୱାନ ଦେଇଥିଲେ । ଏଥିସହ ଭୋଟ୍ ଚୋରି ରୋକିବାକୁ ପଡ଼ିବ ବୋଲି ସେ କହିଥିଲେ। ସେପଟେ ଏହି ଘଟଣାକୁ ନେଇ ଦିଲ୍ଲୀର ରାଜନୈତିକ ମାହୋଲ ଗରମ ଥିବାବେଳେ ପରିସ୍ଥିତି ଉପରେ ସମସ୍ତଙ୍କ ନଜର ରହିଛି ।
