ସନା: ୟେମେନରେ ସଂଘର୍ଷ ଜୋରଦାର ହେବାରେ ଲାଗିଛି। ଆଦେନ ସହର ସ୍ଥିତ ରାଷ୍ଟ୍ରପତି ଭବନ ଉପରେ ହୁତି ବିଦ୍ରୋହୀ ଗୁରୁବାର ୫ ବାଲିଷ୍ଟିକ କ୍ଷେପଣାସ୍ତ୍ର ମାଡ଼ କରିଛନ୍ତି। ଏହି ଆକ୍ରମଣ ସମୟରେ ପ୍ରଧାନମନ୍ତ୍ରୀ ସାୟା ମୋହସେନ ଅଲ-ଜିନ୍ଦାନୀ ଓ ଅନେକ ମନ୍ତ୍ରୀ ରାଷ୍ଟ୍ରପତି ଭବନ ପରିସରରେ ଥିଲେ। ତେବେ ସମସ୍ତେ ସୁରକ୍ଷିତ ଅଛନ୍ତି। ସୂଚନା ମନ୍ତ୍ରଣାଳୟ ଅନୁଯାୟୀ, ଏହି ଆକ୍ରମଣରେ ୪ ଜଣଙ୍କ ମୃତ୍ୟୁ ହୋଇଛି। ମୃତକଙ୍କ ମଧ୍ୟରେ ୨ ଜଣ ସୁରକ୍ଷାକର୍ମୀ ସାମିଲ ଅଛନ୍ତି। ହୁତି ବିଦ୍ରୋହୀ କହିଛନ୍ତି ଯେ ଆଦେନରେ ଥିବା ସାଉଦି ଆରବର ସାମରିକ ଅଭିଯାନ ମୁଖ୍ୟାଳୟକୁ ନିଶାଣ କରି ଆକ୍ରମଣ କରାଯାଇଛି।
ଅସ୍ତ୍ରଶସ୍ତ୍ର ଗଚ୍ଛିତ ଥିବା ଏକ ଭଣ୍ଡାରକୁ ନିଶାଣ କରାଯାଇଥିଲା ବୋଲି ହୁତି ଗଣମାଧ୍ୟମ ଦାବି କରିଛି। ତେବେ ଏହା ସତ ନା ମିଛ ତାହା ଜଣାପଡ଼ି ନାହିଁ। ସୂଚନାଯୋଗ୍ୟ ଯେ ଆଦେନ ହେଉଛି ଅନ୍ତର୍ଜାତୀୟ ମାନ୍ୟତା ପ୍ରାପ୍ତ ୟେମେନ ସରକାରଙ୍କ ଅସ୍ଥାୟୀ ରାଜଧାନୀ। ଦେଶରେ ସରକାର ଓ ଇରାନ ସମର୍ଥିତ ହୁତି ବିଦ୍ରୋହୀଙ୍କ ମଧ୍ୟରେ ଦୀର୍ଘ ଦିନ ଧରି ସଂଘର୍ଷ ଜାରି ରହିଛି। ୟେମେନ ସରକାରଙ୍କୁ ସାଉଦି ଆରବ ସମର୍ଥନ ଦେଇ ହୁତିଙ୍କ ବିରୋଧରେ ଲଢ଼ିବାକୁ ଅସ୍ତ୍ରଶସ୍ତ୍ର ସହାୟତା କରୁଛି। ଅନ୍ୟପକ୍ଷରେ ହୁତି ବିଦ୍ରୋହୀଙ୍କୁ ଇରାନ ସମର୍ଥନ ଦେଉଥିବା ଅଭିଯୋଗ ହେଉଛି। ଏହି ଆକ୍ରମଣ ଦ୍ବାରା ସଂଘର୍ଷ ଆହୁରି ବୃଦ୍ଧି ପାଇବ ବୋଲି ଆଶଙ୍କା କରାଯାଉଛି। ଏହା ମଧ୍ୟରେ ଚୀନ ସହାୟତାରେ ହୁତି ବିଦ୍ରୋହୀ କ୍ଷେପଣାସ୍ତ୍ର ନିର୍ମାଣ କରୁଥିବା ନେଇ ବ୍ରିଟେନ୍ର ସଂସ୍ଥା କନ୍ଫ୍ଲିକ୍ଟ ଆର୍ମାମେଣ୍ଟ ରିସର୍ଚ୍ଚ (ସିଏଆର) ପକ୍ଷରୁ ରିପୋର୍ଟ ପ୍ରକାଶ ପାଇଛି।
ଏଥିରେ କୁହାଯାଇଛି ଯେ ବିଦ୍ରୋହୀମାନେ ଇରାନରେ ଡିଜାଇନ୍ କରାଯାଇଥିବା ଖୈବର ଶିକାନ୍ କ୍ଷେପଣାସ୍ତ୍ର ଭଳି ଏକ କ୍ଷେପଣାସ୍ତ୍ର ପ୍ରସ୍ତୁତ କରିବାକୁ ଚାହୁଁଛନ୍ତି। ଏହି କ୍ଷେପଣାସ୍ତ୍ରର ଆକ୍ରମଣ କ୍ଷମତା ପ୍ରାୟ ୧,୫୦୦ କିମି। ହୁତି ଏହା ପ୍ରସ୍ତୁତ କରିବାରେ ସଫଳ ହେଲେ ସାଉଦି ଆରବ ସହିତ ଇସ୍ରାଏଲ୍କୁ ସହଜରେ ଆକ୍ରମଣ କରିପାରିବେ।
