ନୂଆଦିଲ୍ଲୀ : ଆଜି ଶପଥ ନେଲେ ନୂଆ CJI । ଦେଶର ୫୩ତମ ପ୍ରଧାନ ବିଚାରପତି ଭାବେ ଶପଥ ନେଲେ ଜଷ୍ଟିସ୍ ସୂର୍ଯ୍ୟ କାନ୍ତ । ରାଷ୍ଟ୍ରପତି ଭବନରେ ଏକ ସ୍ୱତନ୍ତ୍ର ଉତ୍ସବରେ ମହାମହିମ ତାଙ୍କୁ ପଦ ଓ ଗୋପନୀୟତାର ଶପଥ ପାଠ କରିଛନ୍ତି । ସେ ବର୍ତ୍ତମାନର ପ୍ରଧାନ ବିଚାରପତି ଜଷ୍ଟିସ୍ ଭୂଷଣ ରାମକୃଷ୍ଣ ଗଭାଇଙ୍କ ସ୍ଥାନ ନେବେ। ହରିୟାଣାରୁ ପ୍ରଥମ ପ୍ରଧାନ ବିଚାରପତି ହେବାର ଗୌରବ ଅର୍ଜନ କରିଛନ୍ତି ଜଷ୍ଟିସ୍ ସୂର୍ଯ୍ୟ କାନ୍ତ। ଏପ୍ରିଲ ୨୦୨୭ ଯାଏଁ ତାଙ୍କ କାର୍ଯ୍ୟକାଳ ରହିବ। ଅର୍ଥାତ ସେ ୧୪ ମାସ ପ୍ରଧାନ ବିଚାରପତି ଦାୟିତ୍ବରେ ରହିବେ । ଜଷ୍ଟିସ ସୂର୍ଯ୍ୟ କାନ୍ତଙ୍କ ଶପଥ ଗ୍ରହଣ ଉତ୍ସବରେ ଉପରାଷ୍ଟ୍ରପତି , ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, କେନ୍ଦ୍ର ଆଇନ ମନ୍ତ୍ରୀ ଅର୍ଜୁନ ରାମ ମେଘୱାଲ ଏବଂ ବରିଷ୍ଠ ବିଚାରପତିମାନେ ଯୋଗ ଦେଇଛନ୍ତି ।

ଭୁଟାନ, କେନିୟା, ମରିସସ, ନେପାଳ ଏବଂ ଶ୍ରୀଲଙ୍କାର ପ୍ରଧାନ ବିଚାରପତିଙ୍କ ସମେତ ୧୫ ଜଣ ବିଦେଶୀ ଅତିଥି ଶପଥ ଗ୍ରହଣ ସସାରୋହରେ ଯୋଗ ଦେବାର କାର୍ଯ୍ୟକ୍ରମ ରହିଥିଲା । ପଡ଼ି ରହିଥିବା ମାମଲାଗୁଡିକର ତ୍ୱରିତ ଫୈସଲା, ଜଷ୍ଟିସ ସୂର୍ଯ୍ୟ କାନ୍ତଙ୍କ ଆଗରେ ବଡ଼ ଚ୍ୟାଲେଞ୍ଜ। ଦେଶର ବିଭିନ୍ନ ଅଦାଲତରେ ପଡ଼ି ରହିଛି ୫.୨୯ କୋଟିରୁ ଊର୍ଦ୍ଧ୍ୱ ମାମଲା । ଏହାର ସମାଧାନ ପାଇଁ ଜଷ୍ଟିସ୍ ସୂର୍ଯ୍ୟ କାନ୍ତ ଏକ ବ୍ୟାପକ ଯୋଜନା ପ୍ରସ୍ତୁତ କରିଛନ୍ତି । ଗୁରୁତ୍ୱପୂର୍ଣ୍ଣ ମାମଲାଗୁଡ଼ିକର ଶୀଘ୍ର ଶୁଣାଣି ପାଇଁ ସେ କିଛି ସପ୍ତାହ ମଧ୍ୟରେ ୫, ୭ ଓ ୯ ଜଣିଆ ବିଚାରପତିଙ୍କୁ ନେଇ ସାମ୍ବିଧାନିକ ଖଣ୍ଡପୀଠ ଗଠନ କରିଛନ୍ତି । ମାମଲା ବୋଝ କମାଇବା ପାଇଁ ସେ ‘ମଧ୍ୟସ୍ଥତା’ ଉପରେ ଜୋର ଦେଇ କହିଛନ୍ତି ଯେ ଏହା ଲକ୍ଷ ଲକ୍ଷ ମାମଲା ହ୍ରାସ କରିବାରେ ସାହାଯ୍ୟ କରିବ । ନ୍ୟାୟପାଳିକାରେ କୃତ୍ରିମ ବୁଦ୍ଧିମତ୍ତା ବା ଏଆଇର ବ୍ୟବହାର ସମ୍ପର୍କରେ ସେ ସତର୍କତାର ସହ ଆଗକୁ ବଢିବାକୁ ମତ ଦେଇଛନ୍ତି ।