ନୂଆଦିଲ୍ଲୀ: ଭାରତର ମୁଖ୍ୟ ନିର୍ବାଚନ ଆୟୁକ୍ତ ଜ୍ଞାନେଶ କୁମାରଙ୍କ କାର୍ଯ୍ୟଶୈଳୀ ଏବଂ ନିର୍ବାଚନ ଆୟୋଗରେ ଥିବା ଆଭ୍ୟନ୍ତରୀଣ ମତଭେଦକୁ ନେଇ ଜାତୀୟ ରାଜନୀତି ଏବେ ସରଗରମ ହୋଇପାରିଛି । ବିଶେଷ କରି ଏସଆଇଆର ଏବଂ ନିର୍ବାଚନୀ ପ୍ରକ୍ରିୟାର ସ୍ୱଚ୍ଛତା ପ୍ରସଙ୍ଗରେ ବିରୋଧୀ ଦଳଗୁଡ଼ିକ ଆକ୍ରମଣାତ୍ମକ ରୂପ ଧାରଣ କରିଛନ୍ତି । ଶୁକ୍ରବାର ଦିନ କଂଗ୍ରେସ ପକ୍ଷରୁ ସାରା ଦେଶରେ ଥିବା ନିର୍ବାଚନ ଆୟୋଗ କାର୍ଯ୍ୟାଳୟ ସମ୍ମୁଖରେ ବିଶାଳ ବିକ୍ଷୋଭ ପ୍ରଦର୍ଶନ କରାଯାଇଛି ।
ଏହା ପୂର୍ବରୁ ଗୁରୁବାର ଦିନ ଲୋକସଭା ବିରୋଧୀ ଦଳ ନେତା ରାହୁଲ ଗାନ୍ଧୀ ସିଇସି ଜ୍ଞାନେଶ କୁମାରଙ୍କ ତୁରନ୍ତ ଇସ୍ତଫା ଦାବି କରିଥିଲେ। ଅନ୍ୟପକ୍ଷରେ, ‘କକରୋଚ୍ ଜନତା ପାର୍ଟି’ ସଙ୍ଗଠନ ଆସନ୍ତା ୪୮ ଘଣ୍ଟା ମଧ୍ୟରେ ସିଇସି ଇସ୍ତଫା ନଦେଲେ ବ୍ୟାପକ ଆନ୍ଦୋଳନ କରିବାକୁ ଚେତାବନୀ ଦେଇଛି । ବିହାରର ସମସ୍ତ ଜିଲ୍ଲା ମୁଖ୍ୟାଳୟରେ ଆରଜେଡି ପକ୍ଷରୁ ମଧ୍ୟ ସମାନ ଦାବି ନେଇ ଧାରଣା ପ୍ରଦର୍ଶନ କରାଯାଇଛି । କେବଳ ସେତିକି ନୁହେଁ, ସମ୍ବିଧାନିକ ଉପାୟରେ ସିଇସିଙ୍କ ବିରୋଧରେ ସଂସଦରେ ମହାଭିଯୋଗ ଆଣିବାକୁ ବିରୋଧୀ ମେଣ୍ଟ ପ୍ରସ୍ତୁତି ଚଳାଇଥିବା ସୂଚନା ମିଳିଛି ।
ଆଇନଗତ ଦିଗରୁ ମଧ୍ୟ ମୁଖ୍ୟ ନିର୍ବାଚନ ଆୟୁକ୍ତଙ୍କ ଅଡ଼ୁଆ ବଢ଼ିବାରେ ଲାଗିଛି । ତୃଣମୂଳ କଂଗ୍ରେସ ସାଂସଦ ମହୁଆ ମୋଇତ୍ରା ନୂଆଦିଲ୍ଲୀର ପାର୍ଲାମେଣ୍ଟ ଷ୍ଟ୍ରିଟ୍ ଥାନାରେ ସିଇସିଙ୍କ ବିରୋଧରେ ଲିଖିତ ଅଭିଯୋଗ ଦାୟର କରିଛନ୍ତି । ସୋସିଆଲ୍ ମିଡିଆରେ ଜ୍ଞାନେଶ କୁମାରଙ୍କୁ ଜଣେ ‘ଠକ ଏଜେଣ୍ଟ’ ଭାବେ ଆକ୍ଷେପ କରି ମହୁଆ କହିଛନ୍ତି ଯେ, ସେ ଅନ୍ୟ ଦୁଇ ନିର୍ବାଚନ ଆୟୁକ୍ତଙ୍କ ବିନା ସହମତିରେ ଏକତରଫା ଭାବେ ନିଷ୍ପତ୍ତି ନେଉଛନ୍ତି । ପ୍ରକୃତ ଭୋଟରଙ୍କ ଅଧିକାର ଛଡ଼ାଇ ନେବା କୌଣସି ସରକାରୀ କାର୍ଯ୍ୟ ନୁହେଁ ଏବଂ ତାଙ୍କ ବିରୋଧରେ ଆପରାଧିକ ମୋକଦ୍ଦମା ହେବା ଆବଶ୍ୟକ ବୋଲି ସେ ଯୁକ୍ତି ବାଢ଼ିଛନ୍ତି ।
