କିଭ୍: ୟୁକ୍ରେନ ଉପରେ ଋଷର ସାମରିକ ଆକ୍ରମଣ ଆହୁରି ଭୟାନକ ରୂପ ନେଇଛି। ଦକ୍ଷିଣ ୟୁକ୍ରେନର ଜାପୋରିଜିଆ ଅଞ୍ଚଳରେ ଥିବା କୋମିଶୁଭାଖା ଗ୍ରାମର ଏକ ମାନବୀୟ ସହାୟତା କେନ୍ଦ୍ର ଉପରେ ଋଷ ସେନା ଭୟଙ୍କର ବୋମା ମାଡ଼ କରିଛି। ୟୁକ୍ରେନ କର୍ତ୍ତୃପକ୍ଷ ଏବଂ ଜରୁରୀକାଳୀନ ସେବା ସଂସ୍ଥାର ସୂଚନା ଅନୁଯାୟୀ, ଏହି ସାଂଘାତିକ ଆକ୍ରମଣରେ ଅନ୍ତତଃ ୨୬ ଜଣ ନିରୀହ ଲୋକଙ୍କର ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ ଉଦ୍ଧାରକାରୀ ଦଳର ଦୁଇଜଣ ସଦସ୍ୟ ଏବଂ ଚାରିଜଣ ପୋଲିସ ଅଫିସର ମଧ୍ୟ ସାମିଲ ଅଛନ୍ତି।
ଏହି ସହାୟତା କେନ୍ଦ୍ରଟି ଏକ ବିଦ୍ୟାଳୟ ପରିସରରେ ଚାଲୁଥିଲା, ଯେଉଁଠାରେ ସ୍ଥାନୀୟ ନାଗରିକମାନଙ୍କୁ ନିୟମିତ ଭାବେ ରିଲିଫ ଓ ଜରୁରୀ ସାମଗ୍ରୀ ବଣ୍ଟନ କରାଯାଉଥିଲା। ରିପୋର୍ଟ ଅନୁଯାୟୀ, ଋଷୀୟ ବିମାନରୁ ଏକାଧିକ ବୋମା ଏହି ଆଶ୍ରୟସ୍ଥଳ ଓ ସହାୟତା କେନ୍ଦ୍ର ଉପରେ ନିକ୍ଷେପ କରାଯାଇଥିଲା। ଆକ୍ରମଣ ଫଳରେ ଘଟଣାସ୍ଥଳରେ ବ୍ୟାପକ କ୍ଷତି ଘଟିଛି ଏବଂ ଅନେକ ଲୋକ ଗୁରୁତର ଭାବେ ଆହାତ ହୋଇଛନ୍ତି, ଯାହାଙ୍କୁ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି।
ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେନସ୍କି ଏହି ଆକ୍ରମଣକୁ “ଅତ୍ୟନ୍ତ ହୃଦୟବିଦାରକ ଓ ଅତ୍ୟାଚାରପୂର୍ଣ୍ଣ” ବୋଲି ଅଭିହିତ କରିଛନ୍ତି। ସେ କହିଛନ୍ତି ଯେ ଋଷ ସୁରକ୍ଷିତ ମାନବୀୟ କ୍ଷେତ୍ରକୁ ଲକ୍ଷ୍ୟ କରି ପ୍ରମାଣିତ କରୁଛି ଯେ ସେ ଯୁଦ୍ଧବିରାମ କିମ୍ବା ଶାନ୍ତି ଚାହୁଁନାହିଁ। ଘଟଣାସ୍ଥଳରେ ଉଦ୍ଧାରକାର୍ଯ୍ୟ ଜାରି ରହିଛି ଏବଂ ଧ୍ୱଂସାବଶେଷ ତଳେ ଆଉ କିଛି ଲୋକ ଫସି ରହିଥିବା ଆଶଙ୍କା କରାଯାଉଛି। ତେବେ ଏହି ସାଂଘାତିକ ବିସଫୋରଣ ସମ୍ପର୍କରେ ଋଷ ପକ୍ଷରୁ ଏପର୍ଯ୍ୟନ୍ତ କୌଣସି ପ୍ରତ୍ୟକ୍ଷ ସାର୍ବଜନୀନ ପ୍ରତିକ୍ରିୟା ଦିଆଯାଇ ନାହିଁ।
ସହାୟତା କେନ୍ଦ୍ର ଉପରେ ହୋଇଥିବା ଏହି ବର୍ବରତାପୂର୍ଣ୍ଣ ଆକ୍ରମଣ ପରେ ପଶ୍ଚିମ ଦେଶଗୁଡ଼ିକ ତୀବ୍ର ନିନ୍ଦା କରିଛନ୍ତି। ଅନ୍ତର୍ଜାତୀୟ ସମୁଦାୟ ତୁରନ୍ତ ୟୁକ୍ରେନକୁ ଅଧିକ ବାୟୁ ପ୍ରତିରକ୍ଷା ବ୍ୟବସ୍ଥା ଯୋଗାଇ ଦେବାକୁ ଦାବି କରିଛନ୍ତି। ଯୁଦ୍ଧ କ୍ଷେତ୍ରରେ ସାଧାରଣ ନାଗରିକଙ୍କ ସୁରକ୍ଷାକୁ ନେଇ ପୁଣିଥରେ ବିଶ୍ୱବ୍ୟାପୀ ଗମ୍ଭୀର ଚିନ୍ତା ପ୍ରକାଶ ପାଇଛି।
