ମହାରାଷ୍ଟ୍ର : ମହାରାଷ୍ଟ୍ରର ଲୋନାୱାଲାରୁ ଏକ ଦୁଃଖଦ ଘଟଣା ସାମ୍ନାକୁ ଆସିଛି । ଲୋନାୱାଲାରେ ନବୀ ମୁମ୍ବାଇର ୧୯ ବର୍ଷୀୟ ଲ ଛାତ୍ରୀଙ୍କର ମୃତ୍ୟୁ ଘଟିଛି । ଟ୍ରେକିଂ ସମୟରେ ଏପରି ଘଟଣା ଘଟିଥିବା ଜଣାପଡିଛି । ମୃତକ ଶ୍ରେୟା ପତି ବୋଲି ଚିହ୍ନଟ କରାଯାଇଛି ।
ସୂଚନାନୁଯାୟୀ, ଏହି ଦୁର୍ଘଟଣା ଲୋନାବାଲାର ଟାଇଗର ପଏଣ୍ଟ ଭ୍ୟାଲିର ଡ୍ୟୁକ୍ସ ନୋଜ୍ ଅଞ୍ଚଳରେ ଘଟିଛି । ଯୁବତୀ ଜଣକ ଜାନୁଆରୀ ୩୧ ତାରିଖରେ ଟ୍ରେକିଂ ପାଇଁ ମୁମ୍ବାଇରୁ ଲୋନାୱାଲା ଆସିଥିଲେ । କିନ୍ତୁ ଟ୍ରେକିଂ ସମୟରେ ୩୯୦ ଫୁଟ ଗଭୀର ଘାଟିରେ ଖସି ପଡିଥିଲେ । ଅନେକ ଚେଷ୍ଟା ପରେ ଯୁବତୀଙ୍କ ମୃତଦେହ ଉଦ୍ଧାର କରାଯାଇଥିଲା । ଡ୍ୟୁକ୍ସ ନୋଜ୍ ଅଞ୍ଚଳରେ ଟ୍ରେକିଂ କରିବା ପରେ, ସେ ସନ୍ଧ୍ୟା ପର୍ଯ୍ୟନ୍ତ ଘରକୁ ଫେରି ନଥିଲେ । ଏହା ପରେ, ତାଙ୍କ ପରିବାର ରାତିରେ ଲୋନାୱାଲାରେ ପହଞ୍ଚି ତାଙ୍କୁ ଖୋଜାଖୋଜି ଆରମ୍ଭ କରିଥିଲେ, ସ୍ଥାନୀୟ ବାସିନ୍ଦାଙ୍କୁ ପଚରାଉଚରା କରିଥିଲେ । ପ୍ରଥମେ ତାଙ୍କ ସମ୍ପର୍କରେ କୌଣସି ସୂଚନା ମିଳି ନଥିଲା । ଯୁବତୀଙ୍କୁ ନପାଇବାରୁ ପରିବାର ଲୋକେ ଲୋନାୱାଲାର ପୋଲିସ ଷ୍ଟେସନରେ ନିଖୋଜ ଅଭିଯୋଗ କରିଥିଲେ । ପୋଲିସ ଅନେକ ଖୋଜାଖୋଜି କରିବା ପରେ ଯୁବତୀଙ୍କ ବ୍ୟାଗ୍ ମିଳିଥିଲା । ଯାହା ପରେ ଶ୍ରେୟାଙ୍କର ବୋଲି ଚିହ୍ନଟ କରାଯାଇଥିଲା । ଏହା ପରେ ସନ୍ଧାନ କାର୍ଯ୍ୟ ଆରମ୍ଭ କରାଯାଇଥିଲା ।
ଏଥିସହ ସକାଳ ପ୍ରାୟ ୧୧ ଟା ୩୦ ମିନିଟରେ ଉଦ୍ଧାରକାରୀ ଟିମକୁ ସତର୍କ କରାଯାଇଥିଲା ଏବଂ ଶିବଦୁର୍ଗ ଉଦ୍ଧାରକାରୀ ଟିମ୍ ଦ୍ବିପହର ୨. ୩୦ ମିନିଟରେ ଘଟଣାସ୍ଥଳରେ ପହଞ୍ଚିଥିଲେ । ଏହି ସନ୍ଧାନ ଅଭିଯାନରେ ପୋଲିସ ଡ୍ରୋନ୍, ଡଗ୍ ସ୍କ୍ବାଡ୍ ଏବଂ ପରେ ଏକ ବଜ୍ରପାତ ଡ୍ରୋନ୍ ସାମିଲ ହୋଇଥିଲା। ନିରନ୍ତର ଖୋଜାଖୋଜି ପରେ, ଶ୍ରେୟାଙ୍କ ମୃତଦେହ ୩୯୦ ଫୁଟ ଗଭୀର ଘାଟିରୁ ମିଳିଥିଲା ।
ଅନ୍ୟପଟେ ଅନେକ ଚେଷ୍ଟା ପରେ ମୃତଦେହକୁ ସୁରକ୍ଷିତ ଭାବରେ ଉଦ୍ଧାର କରିଥିଲେ । ରାତି ପ୍ରାୟ ୯ ଟା ୩୦ ମିନିଟରେ ଯୁବତୀଙ୍କ ମୃତଦେହକୁ ପରିବାରକୁ ହସ୍ତାନ୍ତର କରିଥିଲା ପୋଲିସ । ପୋଲିସ ଦୁର୍ଘଟଣାଜନିତ ମୃତ୍ୟୁ ମାମଲା ରୁଜୁ କରି ଅଧିକ ତଦନ୍ତ ଆରମ୍ଭ କରିଛି ।
