ଯୁବକଙ୍କ ମୃତ୍ୟୁ ପରେ ଉତ୍ତ୍ୟକ୍ତ ହୋଇପଡ଼ିଛନ୍ତି ସ୍ଥାନୀୟ ଲୋକେ । ପ୍ରତିବାଦରେ ୟୁଏଫ୍‌ଟିଓଏ କାର୍ଯ୍ୟାଳୟରେ ପଶି ଭଙ୍ଗାରୁଜା କରିବା ସହ ଦରଲିପାଲି ଅଞ୍ଚଳରେ ଥିବା ଏକ କାର୍‌କୁ ଜାଳି ଦେଇଛନ୍ତି । ଘଟଣା ସମୟର ସିସିଟିଭି ଫୁଟେଜ୍‌ ମଧ୍ୟ ସାମ୍ନାକୁ ଆସିଛି । ଏନଟିପିସି ଦର୍ଲିପାଲିରୁ ପାଉଁଶ ପରିବହନ କରୁଥିବା ଟ୍ରକ୍‌ଗୁଡ଼ିକରୁ ବେଆଇନ ଚାନ୍ଦା ଆଦାୟ ଏବଂ ବ୍ୟବସାୟିକ ଆଧିପତ୍ୟକୁ ନେଇ ଦୁଇଟି ଶ୍ରମିକ ସଂଘ ବା ୟୁନିୟନ ମଧ୍ୟରେ ଦୀର୍ଘ ଦିନରୁ ବିବାଦ ଚାଲିଥିଲା। ସୂଚନା ଅନୁସାରେ ଗୁରୁବାର ସନ୍ଧ୍ୟାରେ ଦୁଇ ଗୋଷ୍ଠୀ ମଧ୍ୟରେ ବଚସା ଓ ପରେ ମାରପିଟ୍ ହୋଇଥିଲା। ଏହି ସମୟରେ ବିରୋଧୀ ଗୋଷ୍ଠୀର ଜଣେ ସଦସ୍ୟ ଗୁଳି ଚଳାଇଥିଲେ, ଯାହା ସୁନୀଲଙ୍କ ଛାତିରେ ବାଜିଥିଲା।