ଭୁବନେଶ୍ୱର: ଆଗାମୀ ୨୦୨୭ ମସିହାରେ ଅନୁଷ୍ଠିତ ହେବାକୁ ଥିବା ପଞ୍ଚାୟତ ଏବଂ ମ୍ୟୁନିସିପାଲିଟି ନିର୍ବାଚନ ପାଇଁ ରାଜ୍ୟରେ ଏବେଠାରୁ ପ୍ରସ୍ତୁତି ପର୍ବ ଆରମ୍ଭ ହୋଇଯାଇଛି । ସ୍ଥାନୀୟ ସ୍ୱାୟତ୍ତ ଶାସନ ନିର୍ବାଚନକୁ ସ୍ୱଚ୍ଛ, ଅବାଧ ଏବଂ ସୁରୁଖୁରୁରେ ସମ୍ପନ୍ନ କରିବା ଲକ୍ଷ୍ୟରେ ରାଜ୍ୟ ନିର୍ବାଚନ କମିଶନଙ୍କ ପକ୍ଷରୁ ଏକ ତ୍ରୁଟିମୁକ୍ତ ଭୋଟର ତାଲିକା ପ୍ରସ୍ତୁତି ଉପରେ ସର୍ବାଧିକ ଗୁରୁତ୍ୱ ଦିଆଯାଉଛି । ଏହି କ୍ରମରେ ସାରା ରାଜ୍ୟରେ ଭୋଟର ତାଲିକା ସଂଶୋଧନ ଏବଂ ଯାଞ୍ଚ ପ୍ରକ୍ରିୟା ଆନୁଷ୍ଠାନିକ ଭାବେ ଆରମ୍ଭ ହୋଇଛି ।
ବିଭାଗୀୟ ସୂଚନା ଅନୁଯାୟୀ, ଆସନ୍ତା ଅକ୍ଟୋବର ୨୬ ତାରିଖରୁ ନଭେମ୍ବର ୭ ତାରିଖ ପର୍ଯ୍ୟନ୍ତ ରାଜ୍ୟବ୍ୟାପୀ ଏକ ବ୍ୟାପକ ‘ଡୋର୍-ଟୁ-ଡୋର୍’ ବା ଘରକୁ ଘର ବୁଲି ସର୍ଭେ କାର୍ଯ୍ୟକ୍ରମ ଅନୁଷ୍ଠିତ ହେବ । ଏହି ଦୀର୍ଘ ସମୟ ମଧ୍ୟରେ ନିଯୁକ୍ତ ଅଧିକାରୀମାନେ ଲୋକଙ୍କ ଘରକୁ ଯାଇ ଭୋଟରମାନଙ୍କ ସମ୍ପର୍କିତ ସମସ୍ତ ତଥ୍ୟ ସଂଗ୍ରହ ଓ ପୁଙ୍ଖାନୁପୁଙ୍ଖ ଯାଞ୍ଚ କରିବେ। ନୂଆ କରି ୧୮ ବର୍ଷ ବୟସ ଅତିକ୍ରମ କରିଥିବା ଯୋଗ୍ୟ ଯୁବ ଭୋଟରମାନଙ୍କ ନାମ ତାଲିକାରେ ସାମିଲ କରିବା, ମୃତ କିମ୍ବା ସ୍ଥାନାନ୍ତରିତ ହୋଇଥିବା ବ୍ୟକ୍ତିଙ୍କ ନାମ ତାଲିକାରୁ ବାଦ୍ ଦେବା ଏବଂ ଭୋଟର ପରିଚୟ ପତ୍ରରେ ଥିବା ଅନ୍ୟାନ୍ୟ ତ୍ରୁଟିଗୁଡ଼ିକୁ ସୁଧାରିବା ଉପରେ ଏହି କ୍ଷେତ୍ରସ୍ତରୀୟ ସର୍ଭେରେ ପ୍ରାଧାନ୍ୟ ଦିଆଯିବ।ତେବେ ଏହି ବ୍ୟାପକ ସର୍ଭେ ଆରମ୍ଭ ହେବା ପୂର୍ବରୁ, ଏଥିରେ ସାମିଲ ହେବାକୁ ଥିବା ଅଧିକାରୀମାନଙ୍କୁ ଏକ ସ୍ୱତନ୍ତ୍ର ତାଲିମ ପ୍ରଦାନ କରାଯିବାର ବ୍ୟବସ୍ଥା କରାଯାଇଛି ।
ଆସନ୍ତା ସେପ୍ଟେମ୍ବର ୨୩ ତାରିଖରେ ଭୁବନେଶ୍ୱର ସ୍ଥିତ ରାଜ୍ୟ ସମ୍ମିଳନୀ କକ୍ଷ ଠାରେ ରାଜ୍ୟର ସମସ୍ତ ମାଷ୍ଟର ଟ୍ରେନରମାନଙ୍କ ପାଇଁ ଏକ ରାଜ୍ୟସ୍ତରୀୟ ତାଲିମ ଶିବିର ଆୟୋଜନ ହେବାକୁ ଯାଉଛି । ଜିଲ୍ଲା ସ୍ତରରେ ମୁଖ୍ୟ ଟ୍ରେନର ଭାବେ କାର୍ଯ୍ୟ କରିବାକୁ ଥିବା ଅଧିକାରୀମାନଙ୍କୁ ଏହି ଶିବିରରେ ବାଧ୍ୟତାମୂଳକ ଭାବେ ଯୋଗ ଦେବାକୁ ନିର୍ଦ୍ଦେଶ ଦିଆଯାଇଛି । ଭୋଟର ତାଲିକା ପ୍ରସ୍ତୁତି ପ୍ରକ୍ରିୟାରେ କେଉଁ ସବୁ ନୂତନ ନିୟମାବଳୀ ଏବଂ ମାର୍ଗଦର୍ଶିକା ପାଳନ କରାଯିବ, ସେ ନେଇ ଏହି ତାଲିମରେ ବିସ୍ତୃତ ଭାବେ ବୁଝାଯିବ ।
ରାଜ୍ୟସ୍ତରୀୟ ତାଲିମ କାର୍ଯ୍ୟକ୍ରମ ସଫଳତାର ସହ ଶେଷ ହେବା ପରେ, ଉକ୍ତ ମାଷ୍ଟର ଟ୍ରେନରମାନେ ନିଜ ନିଜ ଜିଲ୍ଲା ଏବଂ ବ୍ଲକ୍ ସ୍ତରକୁ ଯାଇ କ୍ଷେତ୍ର ଅଧିକାରୀମାନଙ୍କୁ ଆବଶ୍ୟକୀୟ ତାଲିମ ପ୍ରଦାନ କରିବେ । ଏହାପରେ ବ୍ଲକ୍ ସ୍ତରରେ ତାଲିମପ୍ରାପ୍ତ ଏହି ଅଧିକାରୀମାନେ ହିଁ ଅକ୍ଟୋବର ମାସରୁ ଆରମ୍ଭ ହେବାକୁ ଥିବା ଡୋର୍-ଟୁ-ଡୋର୍ ସର୍ଭେରେ ସିଧାସଳଖ ନିୟୋଜିତ ହୋଇ ଲୋକଙ୍କ ତଥ୍ୟ ସଂଗ୍ରହ କରିବେ । ସୂଚନାଯୋଗ୍ୟ ଯେ, ଆସନ୍ତା ୨୦୨୭ ମସିହା ମାର୍ଚ୍ଚ ଶେଷ ଭାଗ କିମ୍ବା ଏପ୍ରିଲ ପ୍ରଥମ ସପ୍ତାହ ଆଡ଼କୁ ଓଡ଼ିଶାରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ଅନୁଷ୍ଠିତ ହେବାର ପ୍ରବଳ ସମ୍ଭାବନା ରହିଛି ।
